«Аракет» долбоорунун алкагында Алай-1, Алай-2, Эдельвейс жана Манас-Ата конуштарынан 50 активдүү тургун санариптик сабаттуулук боюнча атайын окуудан өтүшкөн. Бул тренингдин негизги максаты – катышуучулар алган билимдерин жергиликтүү тургундарга жеткирип, мамлекеттик жана коммуналдык кызматтарды санариптик платформалар аркылуу колдонууга көмөктөшүү.
Окуудан кийин алар коңшуларына практикалык сабактарды өткөрүп, «Түндүк», «Мой свет», «Мой город», ФОМС сыяктуу кызматтарды пайдалануунун жолдорун түшүндүрүп келишүүдө.
18-августта Эдельвейс конушунда 23 тургун окутулду. 20-августта Алай-1 жана Алай-2 конуштарында 43 тургун санарип кызматтарды колдонуу боюнча билим алышты. 21-августта Манас-Ата конушундагы жатаканада 41 тургун окутулду.
22-августта Эдельвейс конушундагы окутууга 25тен ашык тургун катышса, 25-августта Алай-2 конушунда дагы 20 тургун билим алды. Андан кийинки күнү, 26-августта, Алай-1 жана Алай-2 конуштарында 38 тургунга окутуу өткөрүлдү. 27-августта Алай-1 конушунда 16 тургун санариптик кызматтарды колдонуу боюнча маалымат алса, ошол эле күнү Алай-2 конушундагы №70 орто мектептин 40ка жакын мугалими да окутууга катышты. Ошол эле маалда Манас-Ата кичи районундагы үй-бүлөлүк жатаканада 40тан ашык жаран билим алды. Ал эми 28-августта Эдельвейс конушунда 20дан ашык тургун, Манас-Ата конушундагы жатаканада 30дан ашык жаран окутулду.
Жыйынтыгында, 18–28-август аралыгында жалпы 340дан ашык тургун санариптик кызматтарды колдонуу боюнча билим алышты.
