Бүгүн, 25-февралда Ош шаарынын мэриясында 2025-жылдын бюджетинин долбоору боюнча коомдук угуу өтүп, ага шаардык кеңештин төрагасы Болот Баетов, Ош шаарынын мэринин орун басары Замир Юсупов, бюджет боюнча туруктуу депутаттык комиссиянын төрагасы Кушбак Шайиев, шаардык кеңештин депутаттары, мекеме-ишканалардын жетекчилери, МАБ башчылары, коомдук жана өкмөттүк эмес уюмдар, активисттер жана шаар тургундары катышты.
Иш-чарада “Аракет” долбоорунун алкагындагы максаттуу конуштардын кырктан ашык тургундары өз аймактарындагы көйгөйлөрдү ортого салышты. Алардын катарында “Алымбек Датка” аймагындагы Эдельвейс конушунун жол маселеси, мектеп жана бала бакча жоктугу, “Алай 1” конушундагы сел коркунучу, ошондой эле “Манас-Ата” аймагындагы үй-жатаканалардын артында мыйзамсыз курулган спорт имаратынан чыккан саркынды суу көйгөйү көтөрүлдү.
Шаардык кеңештин төрагасы Болот Баетов жарандар көтөргөн маселелерди белгилеп, “Алай 1” конушундагы сел коркунучуна каршы алдын алуу чаралары көрүлөрүн билдирди.
Иш-чаранын алкагында катышуучуларга 250 маалыматтык китепче жана баннер “Аракет” долбоорунун колдоосу менен даярдалды.
